葉泓聲劉芷君現身將軍澳中心 參與「全運同樂日」活動

前組合天堂鳥成員葉泓聲（Gordon）、《聲夢傳奇2》歌手劉芷君（Aster）聯同單車殿堂級名將洪松蔭及前單車港隊代表馬詠茹今日（29日）出席將軍澳中心舉行的「全運同樂日」，他們大玩單車遊戲，Gondon與Aster又即場獻唱歌曲，炒熱全場氣氛。 Gondon透露今日是帶病出席，表示早前跟隨明星足球隊到大連時，因天氣太凍而開始咳嗽，而具運動細胞的Gondon被問到會否教導孩子，他即坦言雖然自己做過多種運動，如足球、跨欄及欖球等，卻不擅長於教人，又表示有興趣觀看全運會中的田徑及游泳項目。提到在表演環節中他選唱前組合歌曲《登陸太陽》，他解釋原因是歌曲當年推出時被笑奇怪，故希望藉此來平反，更透露之後計劃陸續Cover返自己以前的歌曲，其中《登陸太陽》將會是第一首，笑言符合現在流行的回憶殺，又指計劃在明年推出合共三首歌，預計需自資近七位數金額。 即將在下月2日迎來生日的Gondon，表示生日正日將要跟隨明星足球隊到無錫：「好開心啊，因為呢樣嘢係自己由細到大嘅夢想，入到明星足球隊，同埋宣揚下足球呢個運動（同屋企人呢？）我事業心好重，咁我老婆OK嘅，話返嚟先慶祝啦，你做嘢緊要。」而工作方面除了音樂，他表示亦有劇拍，更澄清自己只是與邵氏及唱片公司完約，但無綫仍有數個月的藝員合約：「其實我第一日講時係多謝邵氏啫，跟住啲人就誤會咗，連公司啲人都以為我唔續（會唔會少咗啲工作機會？）好彩無，大家會幫我了解到（咁之後會唔會續約？）如果TVB肯要我都希望嘅，天堂鳥之後都係TVB比機會，希望佢會同我傾，我係好想繼續拍劇嘅。」 藝術體操出身的Aster表示會觀看游泳、單車及藝術體操項目，順便支持自己的師妹，早前傷及十字韌帶的她亦透露目前正在康復中，暫時未能做劇烈運動。日前剛升讀香港理工大學的Aster表示：「我好開心呀，好鍾意大學，個環境好好全部人都好Nice（兼顧到學業同唱歌？）其實都唔難，個schedule都冇中學咁密，同埋公司都會就我哋啲時間（今年會唔會出歌？）我都想啊，公司未有計劃俾我聽，我都好希望有新歌（擔唔擔心聲秀新人會令競爭更大？）都唔係好擔心，一定係會有啲競爭嘅，但係每個人都有佢獨特嘅Unique，所以做好自己就得。」