金式森林︱陳星妤江嘉敏打交 為求迫真唔留力

無綫台慶劇《金式森林》昨晚（29日）陳星妤與江嘉敏的一場打交戲，星妤被打歪鼻一幕，畫面震撼，成為網民熱話。劇中講到星妤與嘉敏一言不合大打出手，嘉敏邊鬧邊喪篤星妤，令平日保持「公主形象」的星妤也不顧儀態，激烈反擊喪扯對方頭髮，二人拉扯打鬥，配上誇張表情，以及潑婦式對罵，場口極盡花生。之後嘉敏發狂，摑了星妤一巴，豈料卻打歪了她的鼻，因而揭出她原來是整容女、並透過名媛訓練營才順利嫁豪門，星妤被打歪鼻一幕，無論引起觀眾回響，獲網民大讚，令人印象深刻。 陳星妤講到談到與江嘉敏的打戲，笑言為了效果，二人全程是真打，她說：「我哋真係嚟真架，因為大家都明白如果效果唔到位，又要再打多幾次，所以寧願肉緊啲打。我都有事前講明話唔緊要、唔使就角度。」 而扮演有「容貌焦慮」名媛的星妤，今次在角色造型上花盡心思，劇組為了將她打造成Barbie Girl，除了在重要場合為她安排Pinky Lady造型，有半數穿着更以通花喱士設計，包括粉紅色通花喱士露腰裙、白色通花喱士露背裙、橙色通花喱士外套、粉藍色淑女通花、以及通花喱士波希米亞背心，並且多次鮮艷粉色系為主。 除了衣着星妤的髮型亦引發討論，由於星妤無論居家或是出席重要場口，均會以不同款式的鯊魚夾將頭髮夾起、加上極度搶眼的兩撮長蔭，被網民直指撞樣方媛，星妤則表示：「嗰兩撮蔭唔係刻意架其實，純粹係啲頭髮紮起晒冇乜造型，加上我嗰陣個頭髮唔長唔短，所以就咁啱個造型出嚟撞咗方媛個髮型。」講到劇中身形弗到漏，星妤則透露反而事前沒有刻意減磅，皆因她每次開工拍劇便會消瘦，認真幸福。