陳健安西九開唱 帶領大家享受音樂旅程

歌手陳健安宣布將於明年1月於西九舉行演唱會，安仔穿上大地色西裝，在舖了沙粒的「沙漏」場景上拍攝演唱會海報，寓意自己是「沙漏」裏的「沙」，亦代表「時間」，他說：「今次演唱會叫『時的狀態』，我會喺演唱會中控制大家嘅時間。大家忘記晒所有嘢，跟住我嘅節奏、我嘅音樂，忘記各自嘅身份，全部都係我嘅族人，一齊嚟到我嘅party，放低所有時間、年齡，等我帶領大家一齊享受整個音樂旅程。」 去年在麥花臣場館舉行首次個人演唱會的他，今年轉戰戶外演出，非常期待與觀眾享受由黃昏到日落的音樂世界：「之前C AllStar 喺呢個場開過演唱會，感覺好正，可以望住個天，由日光睇住日落唱到天黑，同大自然緊扣，我都想今次演唱會似festival ，好繽紛，有好多互動環節。做outdoor嘅騷，我個人都會outgoing啲，會『E』啲！」 而「尋找新伊甸園」是安仔今年音樂企劃的主題概念，他說：「一個末世，隕石撞落地球，我哋一齊去搵呢個新嘅伊甸園。希望大家入到我嘅演唱會，會有一個咁嘅感覺，好似去咗一個新嘅世界，去explore（探索）自己、呢個世界或者我。喺呢兩個小時裏忘記所有嘢，隨着我嘅音樂去引領大家向前進。」