Yanny明年1月嫁陳考威 澳洲婚禮已經請定圈中人

前Super Girls成員陳穎欣（Yanny）與音樂人陳考威（Gareth）拍拖8年，Gareth今年初首奪「叱咤樂壇監製大獎」，當時佢喺台上公開向女友Yanny示愛，並承諾今年會搞好二人婚禮。41歲嘅陳考威已秘密安排明年1月在澳洲舉行婚禮，據知不少圈中人已收到邀請見證兩人大婚。 Gareth與Yanny自2017年拍拖，已成男方最長一段情侶關係，佢更多次公開感激Yanny鼓勵，並陪伴佢走過兩年前嘅事業低潮。陳考威初出道時被封為「有米監製」，更先後與多位女歌手如連詩雅、JW等傳緋聞，更曾先後與Super Girls兩位成員Heidi及Yanny拍拖，曾有傳兩任女友因爭仔而鬧不和。 多年來，一直有指Super Girls於2018年拆夥各自單飛與陳考威有關，Gareth早前受訪時回應：「其實唔係，當時Super Girls已經去到一個位置，又開埋演唱會啦。其實每個組合去到一個位，成員都會各自獨立發展。BLACK PINK都係咁，佢哋咪仲快！係好正常嘅一個現象，所以我唔覺得係我拆散佢哋。」