宏福苑五級火︱黃美棋偕夫當救災義工 身水身汗仍感動

大埔宏福苑五級火警，截至今日（28日）早上6時，火警共造成94人死亡，傷者共有76人，包括11名消防員。災情嚴重各方響應，連日都有唔同藝人以唔同方式為火災送暖，幫到幾多得幾多，而童星出身嘅藝人黃美棋及老公鍾健威（Ray），佢哋就選擇以行動協助受災居民，身體力行去到大埔做救災義工。 黃美棋尋日（27日）分享佢同老公所見所聞，佢提到兩公婆睇到新聞後，就決定親身去睇吓可以做啲咩幫手，最終二人幫手整理及分配物資，佢亦多次於社交網更新災情所需物品及資訊，熱心助人顯人品。佢又提到現場不停有市民攞物資嚟，大埔現時已停收物資。而喺佢上載嘅多條片段中，亦見到歌手劉以達現身義工現場嘅身影。 令佢最感動嘅係有好多義工，無論係車手定步兵，都企喺街度排好耐，希望萬眾同心出一分力，更有好多中學生放學就自發嚟幫手。當佢出post要反光求生氈時，網友已迅速籌集大量反光求生氈畀佢哋。同時佢呼籲前線及附近市民義工都要戴好口罩，因為現場依然好大煙，大家都要補充水份、能量：「多謝大家一呼百應！亦都多謝喺唔同崗位幫緊手嘅所有義工🙇🏻‍♀️」