何沛珈為火災送暖 寄語大家不要絕望

大埔宏福苑發生奪命大火，造成重大傷亡，災情嚴重各方響應，連日來不少市民包括圈中人都自發以不同方式為火災送暖。藝人何沛珈日前亦親身到物資站幫忙派送物資予受災居民，她接受東網訪問講述經過，表示發生火災當晚凌晨收到朋友短訊，問她會否有時間一起去物資站當義工，她二話不說立即更改工作行程，翌日即帶同家中一些衣物和食物趕往現場，她説：「去嘅路程喺吐露港公路其實已經見到宏福苑，燒到黑晒仲有火光燒緊，睇電視已經覺得好嚴重，但冇諗到親眼目睹係咁嚴重同震撼。」 沛珈指抵達現場後即跟其他義工一起派飯、搬運物資，之後亦將帶備的物資送去社區中心：「其實送到去社區中心嘅時候現場已經有好多人話好多物資，有大量水、食物、被鋪床褥同衣物，亦見到好多香港人係自己組織義工團隊過咗去幫手。」她坦言被大家的無私而感動，覺得一方有難八方支援，每個人都希望盡自己的一分力去幫忙，無論係運送物資、幫手點算、為災民作心理輔導的崗位都有，她續説：「去到社區中心就見到一個個床褥鋪喺地下，有人攬住應該係社工嘅人喺度喊，亦有啲老友記坐咗喺側邊木無表情，好似抽空咗佢嘅靈魂咁，嗰下我真係覺得好心痛，因為我都經歷過屋企人離開，但係佢哋唔單止有啲人係失去咗家人，亦都係失去咗佢哋嘅家園，我諗呢種痛係難以去承擔。」雖然現場物資充足，但始終時間倉卒難免混亂，亦未必真正能將適當物資交到需要的人手中，因此她便聯絡一些機構幫忙：「知道佢哋需要大量嘅襪畀消防員，我就周圍睇吓有邊個朋友或者有邊個舖頭可以幫到手，真係幫得到就幫。」 何沛珈直言事件令人感受到香港人真的很有善心，亦希望傷痛的人可以積極面對，寄語受災情影響的居民不要絕望：「有啲傷痛係要用時間去治愈，相信香港人會陪伴住大家一齊度過！」