新聞女王2︱佘詩曼瞓入水中數十次 零怨言相當專業

台慶劇《新聞女王2》昨晚一集中，無論連場暴雨、梁景仁（佐治，馬國明飾）冒著暴雨採訪的場口、家妍（李施嬅飾）被洪水困在商場、或是Man姐（佘詩曼飾）及佐治遇溺的畫面，都拍得超像真。根據劇組公開的拍攝花絮，為了高度還原二人遭洪水猛衝畫面，劇組預備了兩大桶水打孖淋向阿佘及馬明，由於劇中有大量Man姐整個人浸在水中的Mood Shot，為了拍出好效果，阿佘二話不說按照劇組指示、一次又一次整個人「瞓入水中」（前後重重複覆至少十次），而且每次泡在水中時間也至少10秒，為配合劇情又要在水中睜開雙眼。難得的是，阿佘拍攝時不但全程零怨言，拍畢後還展現出超燦爛笑容，相當敬業樂業。至於馬明雖然不用「瞓入水中」，但要承受「雙倍水量」衝擊之餘，還要拍攝被水沖走時的激烈掙扎畫面，又要被小演員踩住膊頭，絕對是體能考驗之作。 事後二人接受訪問時，談及拍攝情況時，笑言幸好拍攝時天氣炎熱，言談間又透露了在水中浸足成日！阿佘：「夏天起碼唔凍，如果唔係全日浸住喺水入面都好凍。其實頭先喺出面成34度都好鬼熱，寧願落嚟引水道呢度，但係落嚟呢度又要著住件咁焗嘅雨褸，兩邊都出晒汗。我都係第一次喺呢啲引水道拍戲，雖然環境唔係正，但係有Feel咯！」馬明則大讚水質乾淨兼有Feel：「我咁大個仔，唔好話係第一次喺引水道入面拍戲，直情係第一次入引水道。見到上面有啲位發咗霉，你會知道有時啲水真係深到頂咁滯。如果真係有人被困咗喺度，都真係好危險。」並笑言可抱住阿佘拍戲是福利。