Anson Lo深V晒肌神徒配合現粉紅海 1晚換足7次衫

MIRROR成員 「教主」盧瀚霆（Anson Lo）一連5場《ANSON LO "KINGDOM" LIVE 2025》昨晚（6日）假亞博舉行頭場，其演唱會猶如時裝匯演，7個環節換足7套衫，套套靚衫非常落本，極盡視覺享受。 其中一襲Deep V全黑造型，AL坐着有翼的獅身人面機械裝置出場，唱出《你都有今日》，他形容造型是「法老王」，有Metal和Rock & Roll感覺，然後唱出重新編曲的《King Kong》；另一套是AL專屬的粉紅衫，粉紅色流蘇拖地「晨褸」，內裏連身褲同樣心口開V晒出胸肌，他唱出《神隊友》《不可愛教主》和《我的支持型伴侶》時從天而降粉紅心心，全場「神徒」（粉絲暱稱）都亮起粉紅燈，場面壯觀。 AL表示望住粉紅色燈感覺畫面好靚：「我在社交平台和公開場合都講過粉紅海呢3個字，依家望到好完美，粉紅海對我意義好大，唔止純粹因為我好鍾意粉紅色，你哋着粉紅色好可愛，到你哋同粉紅色Related咗，日常生活每次見到粉紅色就諗起你哋，粉紅色咪都係諗住你哋。」他感謝神徒7年來的支持，沒有神徒不能支撐到現在。他說這7年來每日都收到好多示愛：「你哋好直接，唔知道邊度學番嚟，『我愛你呀！豬』呢句我好受呀，我鍾意直接。」然後對着向全場大喊：「我愛你呀！豬」勁冧粉絲。 感謝粉絲不斷送愛、正能量和支持，會每日都關心他要多飲水及休息：「我都好想畀番同樣嘅愛和鼓勵畀你哋，好想做支撐你哋嘅人，我接收嘅愛永遠多過付出，每日去提自己做堅強傳遞能量嘅人，才可以感染更多陪伴我嘅人都開心。」AL續稱近日狀況「好Tense忐忑不安狀態」，回到2023年時，幸粉絲的支持才能夠繼續開騷，感覺大家是伴侶關係：「伴侶對我來講，每一日都會掛住大家，每一日都會Message關心大家，你哋每一位都係支持我嘅伴侶。」心情興奮的他，笑言頭場要威，並帶動全場吶喊，實行「嗌爆亞博」，全場叫喊聲十分大，AL開心地說：「好勁呀，又可愛又叻！」 最後Encore環節，AL更換便服戴眼鏡出場，大喊「我愛你」說：「近排好大壓力，每晚感到心痛，忐忑不安，壓力爆煲狀態，每日收到好多加油鼓勵才可以站到台上，想畀番啲能量你，你一定不孤單，起碼有我陪住你哋，希望大家都Spread love together。」