莊思敏累胡杏兒被指「叛變」感尷尬 親解雙方關係

藝人莊思敏、李思雅及黃子恆等今日（7日）到愉景灣出席世界匹克球商界名人挑戰賽。今年10月報喜再做人妻的莊思敏，與拍拖未夠兩年的老公黃耀彬在峇里島舉行婚禮，婚後首次見傳媒的她容光煥發，高興表示新婚生活Ok，問她為何突然閃婚？她笑指只是沒有跟大家透露，其實跟老公已拍拖兩年，覺得低調處理比較好，亦不會在香港補辦任何儀式，只會跟沒有到當地出席婚禮的親友吃飯。 提到「死敵」胡定欣好姊妹胡杏兒出席完她的婚禮後被外界指「叛變」，莊思敏坦言也覺得很尷尬和不好意思，她説：「我同杏兒老公識咗20年，不嬲都當佢係契哥，杏兒都好好，抽咗2日時間出席，同埋因為我老公係杏兒嘅Fans，細細個間房有杏兒嘅海報，所以杏兒能夠出席好開心，係佢嘅一份結婚禮物，有錢都買唔到！」 談到今次只是行禮並沒有簽字註冊，莊思敏坦言沒有必要，認為法律上的保障是因為下一代：「我哋暫時唔會考慮有下一代，所以唔一定急住要手上嘅文件。（冇打算生小朋友？）冇，個世界太亂，冇乜信心做媽媽，因為責任好大，見到身邊嘅朋友由大肚開始要搵學校，到小朋友讀書又好似自己重新讀書咁，我本身讀書都唔叻，我諗我應該負荷唔到呢件事。」她又指自己未必有足夠時間陪小朋友，這是不負責任的事，故不想勉強，跟老公亦已經有共識，但笑稱很鼓勵身邊的朋友生小朋友，讓她可間中跟小朋友玩吓湊吓，問到下個是否輪到胞妹莊思明結婚？她笑謂：「真係唔知。（佢講咗好耐？）咪係囉，我都嫁咗兩次，所以唔好再畀壓力佢。」她坦言結婚這事情通常由男方去計劃，問女方會很尷尬，所以順其自然，最重要的是二人相處舒服。 現正忙拍劇集《璀璨之城》的她，表示婚後跟以前一樣，也是到處走工作，笑指老公也很享受她每星期有幾天不在港。她表示現時跟無綫是「6騷約」（一年6個騷），覺得現在這合作形式較自由。 談到她早前曾在網上呻朋友借錢不還，工作也被拖數，莊思敏透露兩者加起來有6位數：「我到依家都未收番晒，好嬲呀我！依家努力追緊。（借得預咗收唔返？）個個都係咁講，我捐咗佢好過啦！下次講清楚，唔好話借！我覺得借錢還錢係誠信問題，如果話我真係冇能力還係另一回事，但都OK嘅。我啲朋友都唔係話消失咗，都會同我講遲啲或者係分期，都仲有朋友做，不過就同啲朋友講有咩事唔好再打嚟，唔再借！」 另提到她不時於網上跟網民「開火」，早前又再被網民翻黑歷史算舊帳，她笑指自己惹火，所以留言攻擊性會比較強，出道以來也一直是這樣，認為網上世界大家也有權宣洩感受，自己也開始適應：「近排開始同佢哋玩吓，見到佢哋由一開始可能仲好攻擊性，到慢慢覺得好似幾得意，好想睇我同佢哋嘅互動，我覺得反而緩解我哋之間好多嘅誤會。（你覺得得意？）我唔知喎，我諗大家都覺得有趣，都係用嚟打發時間。」她指近日發生嚴重災害後這些互動也相對少了，或許大家也將焦點放在更需要注意的地方，很希望網絡世界能夠和平和諧一點：「因為有好多鍵盤戰士，喺網上宣洩情緒可以不負責任，但其實咁做會傷害好多人，希望大家唔好再以悲劇嚟開玩笑，唔好對災民造成二次傷害，大家做好自己本分，希望大家盡快可以平伏心情繼續生活。」她坦言身邊有朋友出現情緒問題，認為很值得關注，若發現自己情緒開始不穩，應該向專業人士尋求協助。 另外，她早前應邀出席一個在港舉行的內地交流活動，向來愛投資的她，自婚後反而保守很多，不會再盲目跟風。她說：「依家會投資係股票度多，仲會揀啲穩陣有潛力。(仲有冇玩虛擬投資？)緊係冇啦，始終依家搵錢唔易，全部係血汗錢。」提到她早前專誠往捧張繼聰新片《金童》場，感到做藝人真的不易，知道阿聰花了很多心血去圓夢，睇完部戲都好佩服他的毅力。對於因大埔火災停了宣傳，令該片票房大減，她覺得都估計不到，相信阿聰亦很明白：「佢個人好正能量，見慣晒大風浪，同埋佢同Kay好互相支持，我都要學下佢哋咁，結婚咁多年依然好恩愛。」