胡鴻鈞首演音樂劇壓力爆煲 幸獲高評放下心頭大石

歌手胡鴻鈞（Hubert）早前接受挑戰，首度演出音樂劇《從來是一對》，並於日前在佛山粵劇院完成首站兩場演出，高層樂易玲亦有到場支持。為了音樂劇他事前花了很多苦功排練，壓力大到爆煲，幸全場爆滿及獲觀眾高度評價，令他放下心頭大石，他給自己演出80分：「頭兩場無乜大失誤，所以都算幾滿意，其實我用咗個多月時間去準備，做完感覺係興奮、緊張又刺激，始終係我處男音樂劇，好似好夢幻咁，慶幸係演出時可以好投入到角色入面，好享受整個演戲過程。」 音樂劇中Hubert除了要現場演繹歌舞外，還要唱粵曲，他說：「其實要唱出粵劇韻味真係好難，始終排練時間咁短，我只係盡量模仿個語氣。」由於現場綵排時間不多，演出時也出現蝦碌，他說：「中場戲我要攞阿媽個袋出嚟，但突然忘記咗，心諗點算好呢，好彩飾演我阿媽嘅彭杏英係一個舞台劇經驗非常豐富的嘅演員，發現我冇攞個袋，就立即話阿仔我個袋喺邊呀，你快啲返去幫我攞啦，咁我就即刻跑返入去攞。」小插曲令他明白到做音樂劇執生技巧相當重要，希望之後深圳、中山兩演出會更好。