新片重啟謝票活動 張繼聰獲朋友共患難：唔覺黑仔

張繼聰主演的電影《金童》自11月21日上映至今近3星期，票房收逾700萬，早前因大埔火災事件，停了一段時間的謝票，張繼聰近日在社交平台留言：「好希望可以有番謝票場……個原因係仲有好多紀念品擺咗喺屋企。」粉絲留言表示支持。坐言起行，阿聰昨（9日）再次現身戲院謝票，感謝每一位入場支持他的觀眾，當中更有專程由廣州來港支持阿聰，也有睇超過3次及首次入場的觀眾捧場。 張繼聰於謝票場上，都有跟觀眾談到近期因新片宣傳煞停、已開工之新劇場景燒毀，被指是「黑仔王」的感受，他謂：「我覺得人生遇到好多嘢係無意義嘅，最好係冇意義嘅，由我哋自己去賦予意義。人最嘅大力量係選擇，你可以選擇點樣去睇，我睇每一件事都會用最正面嘅心態去睇。我又唔覺得自己好黑仔，因為我收到好多鼓勵嘅說話，好多人會關心我同仲肉緊過我，我覺得朋友能夠共患難，喺呢個時間會戥你唔抵，想你好，呢啲都係好珍貴，仲有喺依家嘅電影市道，你哋都行入嚟戲院睇戲，我好感謝，所以唔使擔心我，我唔覺得自己黑仔，我覺得自己好幸運。」阿聰說畢，全場掌聲不斷，繼續為他打氣。