朱智賢呻極品外傭開工一星期耍大牌 寸爆對話公開

藝人朱智賢（Ashley）去年宣布與拍拖8年嘅歌手謝東閔分手，之後感情至今一直未有着落，惟愛狗如命嘅佢成日出去開工，好需要有人幫手湊狗仔，因此佢長期僱用外傭。早前幫開朱智賢手嘅姐姐要返印尼，佢都勁唔捨得，唔開心喊到傻咗，到依家都仲日日有聯絡、傾偈，明顯係一位重情義嘅僱主。 點知尋日（10日），佢忽然喺社交網大呻請咗一位新嘅「極品」工人姐姐，對方抵港工作一星期，但已經問題多多，更寸爆反問朱智賢依家咩年代，點可以唔准用手提電話，實行妹仔大過主人婆！朱智賢於限時動態爆Seed：「今日簡直係開拓咗我三觀，工人姐姐問我『依家咩年代呀？唔畀用電話』 我想問香港有邊一個打工仔，喺開工嘅時候可以用電話？然之後再同老闆講以上呢番說話。」 相隔數小時後，朱智賢再苦呻工人姐姐唔肯帶愛犬落街散步：「工人姐姐嚟咗一個星期，同我講佢好攰唔帶隻狗落街兼且態度差，你哋會點處理？」搞到最後佢自己帶愛犬落街散步。唔少網友批評朱智賢呢位「極品」嘅工作態度惡劣，朱智賢亦透露同工人姐姐見面時已講到明照顧隻狗係主要工作，當時位姐姐仲同佢講自己好鍾意狗。網友睇完狂轟外傭「咁你叫佢反鄉下」、「搵番佢間公司講吓先」、「現在啲工人姐姐係博炒，等你炒有得賠」。 朱智賢回覆東網指已同經紀公司溝通，但對方只肯要佢加錢請個新姐姐：「Agent嗰邊咪係咁想做調停囉，然之後就話可以畀番個七折我請番個新㗎囉！但係我本身係畀咗17,000幾蚊囉，好肉痛……」