王祖藍介意老婆似自己 李亞男唔排除重返幕前

藝人王祖藍與太太李亞男今日（11日）出席活動。談到祖藍於《萬千星輝賀台慶》當晚扮「演藝界特朗普」陳百祥（阿叻），化身「精裝明星炒人隊」並唱出改編自《我至叻》：「我入公司炒晒啲阿Head！」、「今日我咁搞、預咗畀你炒」，盡抽阿叻和無綫總經理曾志偉水，祖藍笑言沒有特別用意純屬搞氣氛，他說：「講真幾過癮嘅，其實原來TVB都唔係咁方丈啫！你諗吓我嗰日企晒喺啲阿head面前講呢件事，佢哋又批喎，我覺得幾好吖，都叫做一個進步，哈哈！」他笑指很爽，又指事前全部高層也有看過他們的綵排，更大方的叫他儘管去玩：「其實呢一行就係咁，你玩吓我我玩吓你，大家大方嬉笑怒罵，就係香港娛樂嘅精神。」他笑言期待阿叻再發表偉論便可再玩。 談到近日有多位資深藝人如羅蘭及郭晉安等離巢無綫，祖藍認為要分幾方面去理解事件：「一個係年紀的問題，其實我諗好多演員去到80、90歲，一個係佢哋對表演嘅熱誠，另一樣係身體問題，要睇身體係咪承受得到，如果真係得嘅部頭形式都冇問題，最緊要尊重前輩演員嘅選擇。」他指現時有多種合作形式，正如自己也不在無綫網頁的藝員名單中，但自己也不時回無綫幫忙：「其實我依家都自出自入㗎啦。（仲係創意官？）我依家咩形式都得㗎啦！就咁返去做藝員，耐唔耐返去幫下手咪得！我覺得我哋好多人都係咁，老東家，如果大家係好朋友，仲維持一個好關係，隨時要，我隨時可以返去，其實依家我哋同TVB嘅關係都唔係用一份合約去綁住，我都唔係一份合約但我都返去。」 問到李亞男會否有興趣從返幕前？她直言若有適合的也不介意，提到有網民指她樣子愈來愈似老公，問她會否介意？祖藍即笑指自己很介意，李亞男説：「即係我哋好有夫妻相，我哋仲係好恩愛囉！」她笑言不會嬲，祖藍即賣口乖説：「喺我心目中永遠都係咁靚！」 另提到袓藍早前在內地節目自爆擔心只能活到46歲，問他現時心態可有改變？祖藍坦言經過大埔宏福苑大火慘劇後，不單止自己，相信全香港人也不想再有後悔，會珍惜每一天，又透露因今次的不幸事件，自己有份籌辦的「普世歡騰星光夜」演唱會曾考慮取消，不過當收到一些來自海外觀眾反映，表示屆時會回港渡聖誕同時更想為香港送上祝福及安慰後，便決定繼續舉辦，並透露演唱會的名稱由原定的「普世歡騰星光夜」改為「普世平安星光夜」，他說：「因為大家喺呢段時間都需要平安，演唱會內容同舞台都會有修改，會刪除一啲歡騰、繽紛嘅裝置，改為傾向安慰、平安嘅感覺。」他坦言作出改動難需要額外開支，但認為不要緊，因節目會在海外不同華人的地方轉播，由於大家也很關心今次火災件事，內容能夠回應大家的關切才是最重要：「錢預咗蝕，其實唔係為咗賺錢，譬如杜麗莎老師佢都好關注呢件事，都話即刻改咗啲歌，佢打電話嚟同我講我都即刻喊，我話多謝你呀老師！」