VIVA挑戰「百人起舞」 難忘時刻非常滿足

《2025年度叱咤樂壇流行榜頒獎典禮》今年主題「難先要你做」，為配合主題，與不同歌手合作舉行「難先要你做」校園巡演，日前第二站就由英皇女團VIVA聯同96位學生挑戰「百人起舞」壯舉。活動中成員Ada及 Carina 與學生分享成為女團近兩年間所經歷的挑戰與學習，剖白在追夢路上的困難與成長。ValC 及 Macy亦化身「難題諮詢師」，解答學生學業上的煩惱，並鼓勵他們勇敢面對壓力。VIVA 唱出《不夠浪漫的我們》，為同學送上溫暖與支持。重頭戲是VIVA帶領96位來自浸信會呂明才中學舞蹈學會的同學，合共100人挑戰一鏡到底大跳 VIVA 的快歌《FOMO》。同學們特別為今次挑戰重新編排舞步，分成多組以接力方式完成整首歌曲，最後由 VIVA 帶領下大跳副歌，全程一鏡到底，場面震撼、熱血。VIVA 與同學們當日第一次試跳，已經非常合拍。同學們兼顧學業同時經歷多次排練與調整，使當日的挑戰非常順利。VIVA及96位同學僅用三輪便成功挑戰「百人起舞」，4位成員分享當日感受及難忘時刻。 Carina表示感受到同學的投入與認真，讓她非常滿足：「最深刻係同學同我分享佢哋用咗兩至三個禮拜去準備，感受到大家好認真去準備呢次挑戰。我見到佢哋跳得好enjoy，甚至跳嘅時候都有加自己一啲facial expression，令我覺得好滿足。」ValC 則認為今次演出別具意義，並感激師生的努力：「能夠嚟到表演特別有意義，因為以前打排球學界嘅時候會經常遇到佢哋。超級無敵感激老師同 96 位同學幫我哋隻舞排另一個version，我知道排舞唔簡單，同埋對佢哋嚟講可能都係一個好大嘅 challenge，所以好開心佢哋成功挑戰自己。」Macy指「難題諮詢室」環節令她印象深刻：「有兩位同學仔都問到時間管理嘅問題，令我感受到佢哋嘅壓力十分大。因為喺我咁細個嘅時候其實冇出現過呢種煩惱，知道佢哋係想將自己做到最好，所以想同佢哋講聲加油。希望今日我哋有令佢哋放鬆同緩解壓力，希望佢哋玩得開心同滿足，咁我哋都會好滿足。」Ada 亦補充指今次活動與學生的互動令她感到特別開心：「超級開心可以同同學仔一齊跳舞，因為平時 School tour 好少有咁多互動，甚至係有一齊跳舞嘅環節。另外，我 feel 到佢哋超級熱情又非常守秩序，佢哋淨係會喺原地為我哋歡呼同鼓掌，令我覺得佢哋真係好乖、好可愛， 好多謝佢哋咁投入參與。」