姜濤交叉腳彈出展開Day2個唱 孖女Dancer跳辣舞

組合MIRROR成員姜濤，一連9場「KEUNG TO "LAVA" LIVE 2025」於17日正式展開，出名係「姜糖」嘅藝人毛舜筠，亦有於第一晚入場睇騷，事後更透過社交網感動道：「今晚雖然係你演出嘅第一晚，但已經睇到你非常享受整個舞台，毫不怯場，叻仔！場內每一個都被你的努力和真誠打動，high到不得了，不斷跟着你唱，有些還跟著你哭…在回家的途中，各人都帶着愉快和滿足的心情，哼着你的歌…聲音一直在腦海中盤旋著，久久不散…」；而向來一舉一動備受關注嘅佢，同時亦相當關注外界對自己嘅評論，今日更有粉絲晒出姜濤Day 2嘅演出片段，並反擊道：「你話佢Day One出場跳出嚟唔好睇，佢就今日即刻做畀你，仲要好鬼型！」片中所見，姜濤更以完美交叉腳展開當晚演出。 此外，第二晚換上靚衫與女Dancer展開火辣雙人舞嘅姜濤，更係將現場氣氛推至高潮，只見姜濤先係展現出「Man Power」公主抱之後，更同女Dancer貼臉攬腰熱舞，令全場尖叫聲不斷之餘，更令唔少粉絲直言後悔冇場場買飛入場睇！而更令唔少粉絲備受觸動嘅係，演唱會上姜濤表示自己不善言詞，雖然每次都準備咗好多說話想同粉絲分享，但當真係見面時又唔知點講，並解釋之所以決定如期舉辦演出原因：「以我所知都有一啲我嘅受災嘅Fans仲有睇呢一場演唱會」之後更嗌出宏福苑五級火嘅受絲粉名道：「我都好希望你哋今日睇到嘅話，可以感受到我呢一份力量。我希望在座今晚嘅每一位，可以同我一齊喺呢一個演唱會入邊，釋放自己所有嘅情緒，所有嘅開心又好，唔開心又好，我哋都當係一場夢，我哋盡情今晚發呢一場夢。」接著又唱有份作曲的《寂寞圓舞》表示：「呢首歌代表我呢半年的心聲，好榮幸可參與作曲，希望每一個人心裡面，天使或魔鬼也好，都係你哋嘅一部分，希望你哋每一個人都可以同自己共處。」