黃宗澤角逐視帝Sure Win 半個電視圈都係支持者

由佘詩曼領軍嘅《新聞女王》系列一連兩輯口碑、收視甚佳，劇中每位角色都表現突出，當中黃宗澤（Bosco）於《新聞女王2》憑藉「嘴賤」主播Kingston一角演技大爆發，又「賤格」又討喜，更成功入圍《萬千星輝頒獎典禮2025》「最佳男主角」十強。目前正拍攝邵氏新劇《風華背後》嘅台前幕後，都力撐Bosco奪視帝，趁聖誕派對呼籲觀眾投票支持，此等人緣唔係個個做到。 近日《風華》劇組為聖誕節開大食會、交換禮物，演員蔡少芬、譚耀文、鄭希怡等亦紛紛發聲支持，連汪明荃（阿姐）都特意拍片點名睇好Bosco：「今年視帝我睇好Bosco！多年前合作《野蠻奶奶大戰戈師奶》時他還帶點小子氣，搞笑又生動；這次在《風華》演大律師有模有樣，在《新聞女王2》演奸角更是耳目一新，不是凶神惡煞，而是不經意地『陰濕』，角色設計好，演得更好。努力咁多年，祝福他奪得視帝！」 Bosco於《新聞女王2》中角色成日Mean爆，對白涼薄又句句到肉，配合豐富表情更係令觀眾又愛又恨，連同劇演員高海寧、陳曉華、王敏奕、吳業坤、鄧志堅、龔慈恩、蔣祖曼、袁富華等都先後拍片為Bosco拉票，人緣與演技雙豐收。 與Bosco相識多年嘅圈中好友亦接力應援，有苗僑偉（三哥）、歐陽震華、鍾嘉欣、吳啟華及蔡潔等公開打氣。此外，為助Bosco爭奪視帝，粉絲亦自發製作多款創意宣傳品，包括「Kingston」一比一紙牌立像，以及印有其經典表情嘅「壓力饅頭表情包」，將於今日（24日）平安夜於旺角街頭派發，為Bosco最後衝刺拉票。不少網民更戲言若佢奪得視帝，要公開「審判」Kingston毒舌行徑，角色塑造深入民心勁成功，黃宗澤亦笑言：「多謝大家『恨』我呢個角色，代表我演得夠真啦！」