姜濤第6場個唱送彩蛋 獻唱新歌《情緒30秒》

MIRROR人氣王姜濤昨晚（23日）舉行第6場亞博演唱會，台下有男圑ERROR成員阿Dee（何啟華）捧場，而休場一天的他再踏舞台時，換了全新髮色全因為配合個唱主題，他表示：「頭髮由陰轉陽，由藍色變做紅色，係有呢個小構思。」 一共9場的演唱會將於後天（26號）圓滿結束，姜濤表示進行倒數階段大感不捨：「呢個演唱會尋日（22號）先中場休息完，一直覺得可以休息啦，但臨近瞓覺嘅時諗倒最後4場，所以好珍惜嚟梗呢4晚，每一次嘅表演我都會提醒自己當係最後一晚，有呢個舞台真係好唔容易，遇到大家更加唔容易，我每日都好努力變成一個更好嘅人，我每日都同自己講要努力，要加油，要坦承要真心，因為我相信每個人有呢啲耐心，去同人溝通嘅話，我哋每個人變成Better Man。」 姜濤又覺得做人遇上無力感的時候，擔心再沒有機會開演唱會：「人生都唔知仲有冇機會，呢個世界，我哋都想自己變得愈嚟愈好，但好多事情係我哋自己控制唔到，有時我哋好盡力去做，但有時我哋都會keep住犯錯，犯錯改正，呢個就係人生，所以永遠唔知會發生咩事。」 雖然第6場沒有嘉賓出現，但近演唱會尾聲唱完《蒙着嘴說愛你前》後，姜濤送上超級彩蛋定送聖誕禮物，事緣Encore後，他突然叫全場觀眾留步等他30秒，原來是為粉絲送上新歌《情緒30秒》為大家打氣，他笑住問：「Second Encore，點解要大家留步30秒？因為跟住呢首歌，相信你哋每個人都未聽過，因為係好好秘密咁去製作呢首歌。」又透露新歌在演唱會前，因當時發生事故而影響不少人的心情，所以就創作了這首歌望為大家打氣。 他以過來人的身份繼續說：「相信發生事件令心情唔好，每個人喺人生裏面會有好多情緒困擾，身為Artist嘅我哋都有好多情緒，喺呢半年、一年，我一直學梗一個課題，就係令自己嘅情緒好啲呢？點樣令自己脫離情緒繼續行呢？我一直以嚟都叫自己頂住呀，唔好放棄呀，我由細到大都係自己一個小朋友，冇兄弟姊妹，冇得人商量，我惟有自己同自己做朋友，同自己講頂住，加油、ok嘅。但呢一年，我發覺有啲moment未必得喎，後尾我好多謝我幾個朋友同我講，其實你唔一定要頂住，畀你情緒釋放，哪怕30秒，唔好理任何嘅嘢，唔好理本身咩職業，喺唔傷害其他人嘅情況下，畀你自己嘅情緒好好釋放自己出嚟，所以我都好努力、好努力去做呢個好大嘅課題。」他又寄語希望每位粉絲無論人生遇何幾黑暗的經歷也不要害怕，因每個人都有感同身受。最後他祝福：「希望你哋每一個人都搵到自己情緒嘅出口。」之後再首唱新歌作結。