黃宗澤平安夜旺角為拉票 粉絲逼爆街頭高呼視帝

《萬千星輝頒獎典禮2025》「最佳男主角」候選人之一的黃宗澤（Bosco），今晚平安夜（24日）現身旺角街頭拉票，吸引眾多粉絲圍滿現場，Bosco派發應援物時，粉絲更紛紛直呼「視帝」，令Bosco笑言：「好尷尬啊」，期間戴祖儀更驚喜現身「踩場」，支持Bosco同時不忘為自己拉票，笑言是在「謀朝篡位」。Bosco受訪時表示《新聞女王2》播畢時間接近頒獎禮，加上角色夠賤夠衰，因此至今仍充滿話題性，又指感激這部戲及監製找他拍，亦感激一眾同事在平安夜也出來為他宣傳。 問到他今次是否最有信心得獎？他說：「未必係最有信心，講真，實有幾個角色你係覺得好正嘅，即係以前做過嘅角色好正，希望佢攞，但係攞唔到都冇辦法。（邊個角色？）跛Co囉，仲有好多。」他續指認為每個侯選人機會都大，因為觀眾投票控制不了，自己的3票則會分別投給林保怡、羅子溢及自己，他又指可能大家對他做賤人的角色感到很新鮮，令他笑言思考向賤的方向發展：「我都唔知如果真係憑呢個角色攞咗視帝，會唔會以後凈係做賤嘅角色。」至於戰衣方面未有落實，而提到得獎感言，他笑言早年得到大灣區視帝時忘記感激樂小姐（樂易玲），所以今次要寫定第一個感謝她。 提到應援物壓力球印住Bosco的臉，Bosco就指主意是出自粉絲，但笑言選擇夠衰夠賤的表情則是自己要求的，問到有沒有送給同劇演員，他笑言：「佢哋打我真身啦，使咩畀佢。」不過他亦坦言很感激眾人拍片為他拉票：「多謝所有支持我幫我拍片嘅前輩。（有冇諗過送奶？）你呢個諗法幾好，平時攞獎請食飯，今次可以送一箱奶，或者慶功唔比飲酒要飲奶。（之後仲有點拉票？）有啲線上訪問，做得幾多得幾多。」 至於問到他聖誕及除夕如何過，他指仍需忙於拍劇，今日中午則與《風華背後》的劇組舉行交換禮物派對，透露自己送出美容物品收到咖啡，又指樂小姐額外為每人送出馬票，笑言自己第一次在電視機前對票，可惜第一關已經過不了。此外，問到兩位好兄弟林峯和吳卓羲有否為他拉票，他表示：「佢哋都唔喺香港。（定阿峯掛住《尋秦記》唔記得你？）阿峯掛住張櫈，唔好搞佢啦佢都忙於宣傳。（你會唔會包場支持吓佢？）如果有時間我都可以，不過唔好講包場，實爆硬，《尋秦記》係大家一個幾十年嚟嘅集體回憶，個前奏一響就要睇電視。」