戴祖儀縮減擇偶條件 但求「溝」得掂

無綫小花戴祖儀（Joey）近年百足咁多爪，劇集、綜藝甚至音樂都有涉獵，早前更在台慶劇《新聞女王2》客串飾演銀行客戶經理，替「Man姐」佘詩曼等主角處理人生規劃，她落足心機準備，笑指今次對白超多：「有日同事病咗，我要臨時加戲，2、3個鐘內要背熟自己同其他人嘅對白。」 她指幸好短期記憶力超強，大學時期已擅長速背，但仍感壓力，而且自知仍有很大進步空間，所以不時向前輩討教，又狂煲電影，從演員角度進行剖析：「以前睇劇情，依家會睇演員點做反應、眼神同表情，有時你以為經歷咗好震撼嘅事，會係崩潰、喊，但原來可以係呆咗、反應唔到，你會不停吸收人哋嘅經驗。」 自認「醋娘子」 談到當下感情生活，Joey坦言已單身約3年，笑指家人比她還要着急：「爹哋媽咪想抱孫，但我十畫未有一撇！（擇偶條件？）以前會好多要求，要風趣幽默靚仔，又要有經濟能力、有愛心孝順，但依家覺得溝通到就得。」她笑指自己是「呷醋女友」，相信未必能與圈中人拍拖，因睇到對方拍親熱戲會眼火爆。她不抗拒生B，並透露不少算命師都指其子女宮不錯：「如果我唔生，實在太對唔住個世界，我咁偉大善良嘅人要造福人群，哈哈！」