鮮娛糧︱張敬軒45歲生日變絕育倒數 17年前訪問爆笑翻Hit

歌手張敬軒將於明年2月1日踏入45歲生日，而每年生日都會為張敬軒準備驚喜嘅粉絲，日前竟然為偶像邁入「絕育倒數」，並晒出一張17年前張敬軒表受訪問嘅截圖道：「張敬軒絕育倒數Day38」原來喺2008年接受訪問嘅張敬軒，當時透露屋企嘅唐狗意外搞大咗鄰居愛犬，令佢笑言要安排愛犬做絕育手術，隨後更分享一個坊間傳聞道：「我聽人話，男人如果過咗45歲後做絕育手術，好似前列腺冇咁易有事。」 而當年未滿30歲，依然血氣方剛嘅張敬軒，隨即亦大讚自己身強力壯，深信自己40歲之後仍然有力傳宗接代：「唔會囉！我有做開運動，老而彌堅，遺傳到老竇咁好健康。」未料隨着張敬軒45歲生日將至，當年嘅豪語再次掀起熱話。 此外，出名錫粉絲嘅張敬軒，日前亦趁着聖誕佳節，特意邀請一眾粉絲食Buffet慶祝，事後唔少幸運粉絲更晒出同偶像嘅開心合照炫耀，並大讚對方：「又細心又靚仔又幽默！」