古天樂與宣萱針鋒相對 爆料：佢唔趷過我唔開心

電影《尋秦記》4位主角古天樂（古仔）、宣萱、林峯及朱鑑然近日擔任娛樂訪談節目《一周星星》的嘉賓接受區永權訪問，古仔與宣萱這對營幕CP受訪時不時互窒，宣萱更狂打對方，畫面搞笑，足見兩人感情要好。 在「本尊Fact Check」環節中，區永權求證古仔是否如傳聞所指「唔畀人趷得」，古仔大反應甚大說：「你講咩呀？」並指着宣萱：「佢嗰日唔趷過我唔開心。」區永權聞言追問宣萱：「傳聞呢個世上，得你一個可以對住鏡頭趷古仔。」古仔即時「搶答」：「我澄清番先，佢唔對住鏡頭都係趷架喇。」不過宣萱大力抗議，並指區永權都會寸古仔，古仔聞言搞笑謂：「我好記仇嘅，你死緊喇今次！」期間林峯亦加入戰團，認同古仔：「我喺度諗緊邊一日你係冇趷佢嘅，又好似冇…」、「我未見過有其他人趷佢」。被圍攻的宣萱即強調「開工我冇趷佢嘅」，豈料古仔依然反對：「你咁都夠膽講嘅？！」問到為何任萱宣寸？他坦言：「咁我都唔知吖嘛，我都慣咗喇嘛，你估我想架？！」 另外，宣萱談到拍攝電影時，與當年的當家花旦郭羨妮再度聚首，有感：「大家仲啱傾過以前。」古仔搭訕問：「即係以前唔啱傾？」被宣萱「反白眼」攻擊兼斥對方是「攪屎棍」，之後宣萱提到重遇歐瑞偉時感覺很強烈，並指很快便能投入與對方的感情戲，古仔又再口多多：「即係你同佢有感情線，你意思係。」宣萱聞言嬲到狂打古仔，古仔只能無奈回應：「成日郁手郁腳。」之後宣萱應區永權要求向古仔表達謝意，熱情的她即作勢送上「熊抱」，古仔見狀即閘住：「唔好郁手郁腳呀喂」、「唔好摸呀！」最後連環慘食檸檬的宣萱竟出拳狂打古仔，十分搞笑！ 古仔和宣萱還大方談及劇集《尋秦記》廣傳至今的網紅NG片，其中一條古仔因大力篤宣萱心口，搞到宣萱忍不住爆笑的NG片時，宣萱時隔多年依然覺得搞笑又委屈：「我睇親都笑，我估我睇三十、甚至一百次都會笑，佢冇當我女人咯，總之，可能對佢嚟講力度四架啫，但對我嚟講已經係七、八架喇。」古仔回應：「篤本身唔大力唔係叫做篤嘅，叫做撩！」此外，古仔又大爆宣萱忘記對白瘀事，還笑言宣萱一分鐘都不能停下嘴巴，他說：「你叫佢現場唔講嘢一分鐘係冇可能嘅事嚟，呢個係真事。佢平時一定會同我講嘢架，除咗我病嗰日我先唔應佢架咋！」