吳卓羲平安夜生圖顏值見真章 全程攬實唔放一物

藝人吳卓羲（Ron）近年力攻內地市場，成功打造「港圈顏值天花板」形象，係唔少女士心目中男神，而今個聖誕節，吳卓羲雖然要為娘家TVB拍攝重頭劇《璀璨之城》趕工，但前晚（24日）平安夜佢都有爭取時間見朋友，有網民分享街頭野生捕獲吳卓羲，同友人交談甚歡，完全察覺唔到被偷拍，反而令佢「真面目」曝光！ 身穿棒球褸配闊腳褲嘅吳卓羲，一身「少年感」打扮夠sharp醒，精神飽滿，完全睇唔出已經46歲，加上佢Gel晒頭一身戰鬥格，令生圖流出後，大批網民驚嘆佢保養得宜，洗版留言大讚：「呢個狀態，最多咪30歲」、「好帥，顏值在線」、「狀態好到爆炸」不過網民反而留意到吳卓羲一直緊抱靚酒於懷中，即估佢係去緊開P，慶祝平安夜。其實吳卓羲向來愛杯中物，好友林峯就封佢為「最強酒腳」，惟早年吳卓羲曾自爆捱壞身子傷及肝臟，本身已減少飲酒嘅佢，今次平安夜「酒不離手」，睇嚟佢都為佳節破戒。