何廣沛候選「男配」 獲高層教路反而囉囉攣

藝人何廣沛憑《新聞女王2》候選台慶頒獎禮「男配角」獎項，坦言今年心情特別緊張，除了有兩套台慶劇助攻，更自爆第一次獲高層「加持」，提醒他要努力拉票，但卻令他感到患得患失，飽受壓力。 何廣沛由無綫訓練班入行轉眼已經13年，2018年憑劇集《跳躍生命線》奪得「飛躍進步男藝員」獎項的他，今年更憑台慶劇《新聞女王2》競逐台慶頒獎禮「最佳男配角」，加上有另一套台慶劇《金式森林》助攻，被外間視為熱門人選之一。廣沛坦言今年心情特別緊張，除了因為有兩套台慶劇加持，還自爆有高層「提點」，着他努力拉票：「第一次聽到公司高層同我講，叫我加油、努力拉票，令我好大壓力，自己會揣測，叫我努力拉票意思係咪我唔夠票？定係我夠票？咁即係我做得好定唔好呢？唔知，所以就係因為咁好大壓力。」 明年結婚的廣沛指若然得獎可謂雙喜臨門，是未婚妻腳頭好帶旺他，廣沛說：「未婚妻今年心情就平淡啲，冇我咁緊張，因為佢以為前年我會憑《破毒強人》「啞仔」攞獎，所以有上次經驗，今年佢就放鬆啲。」他指自己除了瞓身拉票，更有「最強後盾」未婚妻用盡人脈，為他向朋友拉票。 「男配角」競爭激烈被行內公認攞獎難度高，講到勝算，他則說：「當年攞完『男飛躍』都知道會有段長時間冇機會競逐獎項，『男飛躍』係新人階段，競爭對手少啲，男配角就好似入咗公海咁，要同全公司競爭，難度就係幾級跳，2016年《律政強人》第一次入圍男配角真係好激動，去到今日雖然同個獎距離近咗啲，但係都冇諗過攞獎。」