曹永廉蕭正楠想幫馬國明攻樂壇 隨時變組合

由曹永廉、麥長青、李思捷、黃智賢及唐文龍組成的中佬組合「Hey Brother」近日專程折返連州演出，台下吸引大批觀眾逼爆現場，相當熱鬧。原來近日5子各有各忙，很難夾期聚在一起，難得今次齊人，為演出劃上完美句號。曹永廉受訪開心表示﹕「因為我哋其中有人喺內地拍劇，咁啱呢段時間要發布新歌《型男而上》，今次好彩夾得到囉。嚟緊除咗要啟動新歌宣傳外，下個月我哋會為廣東衞視錄影春晚節目，3月頭就喺中山開騷，5月飛去美國表演。（好多工作喎。）都算托賴啦。」 而阿廉本身又與好兄弟蕭正楠組成男團「最佳拍檔」，原來他們默默起革命，意欲「助攻」馬國明加入樂壇﹕「本來下個月我、阿蕭同馬國明會開音樂會嘅，但因為時間上有啲匆忙，依家決定押後少少先。（畀馬國明加入？）我哋本身好熟，佢亦都係我同阿蕭首次開騷嘅嘉賓，同佢一齊玩好開心。其實馬國明本身好玩得，又好有觀眾緣，任我哋搓圓按扁，況且冇理由搵個唱歌唱得好過我哋、靚仔過我哋嘅人加入，所以咪搵馬國明囉，哈哈﹗（諗個全新組合名？）都可能嘅，但諗吓先啦。」