吳業坤攞飛躍工作量大增 冇時間實行造人大計

藝人吳業坤今日（10日）現身觀塘出席匹克球活動，引來眾多粉絲到現場支持，活動中他與教練進行比賽表演，又與小朋友玩小遊戲、親自制作匹克球鎖匙扣及手繪球拍送給媽媽及太太，更獻唱了兩首歌曲。吳業坤接受訪問時，指自己平時除了空手道外，亦會嘗試不同的運動，尤其匹克球這種新穎運動近來在藝人界很流行，因此自己都有接觸過，更指希望可以試吓與愛犬一齊嘗試。 吳業坤媽媽今日亦有到場支持，問及父母是否在他獲頒「飛躍進步男藝員」時與太太同樣激動？他表示：「係啊，台上面都有多謝佢哋，因為雖然我又未真係去到不孝，但真係少啲時間陪屋企，多謝佢哋都冇埋怨同投訴。（點同父母慶祝？）今晚食飯。（太太有冇送啲咩俾你？）太太之前請食飯，其實我都諗咗買啲咩獎勵自己，我最近就打機課咗金。」，他續指雖然失落最佳電視歌曲獎，但希望之後有緣份再遇到好劇集和歌曲，今年亦會擺更多時間在唱歌方面。 提到他為入行10周年舉行的音樂會巡演，他指早前已舉辦了廣州站，透露月尾會去多倫多及美國，之後再回到國內多個城市舉行，直言希望尾站能在香港舉行，即使大細都冇所謂，最重要是完成這件感動的事。問到他會否與粉絲們謝票，他指絕對要安排，但因得獎後收到很多客戶邀請，工作量上升，感激大家的認可，因此暫時未有時間，笑言相信朋友和粉絲們會體諒他。 問及事業更上一層樓，會否考慮生育下一代？吳業坤就笑言：「而家連慶功都冇時間，即係你知有啲嘢要好舒服好relax嘅時候先成功，咁所以等我衝一輪先。（所以今年冇計劃？）今年計劃就未有嘅。」