「白頭神探」力壓梅麗史翠普舊作成史上最爆笑電影

適逢是新正頭，是時候搵番幾部喜劇同家人朋友在家中翻睇笑餐飽，太多唔知睇邊部，由美國權威電影雜誌《Variety》選出的「100部電影史上最佳喜劇」中大家或者可以從中參考一下！ 呢個「搞笑電影排行榜」顧名思義就係入圍嘅都係「笑爆嘴」嘅電影，而冠軍就係80年代經典賣座喜劇《白頭神探勇救事頭婆》（The Naked Gun）。呢套戲由搞笑能手「白頭佬」Leslie Nielsen擔正，故事係講呢位撞板多過食飯嘅老差骨查案，而查案過程絕對係「超低能，勁搞笑」，無厘頭指數拍得住我哋嘅星爺。《白》當年一出即大受歡迎，結果一拍就拍咗3集直至1994年第3集《終極侮辱》（Naked Gun 33 1/3: The Final Insult）。而去年，電影公司開拍延續篇《神探零零甩》，並找來唔多搞笑嘅里安納遜（Liam Nesson）負責搞笑，注定失敗。 而僅次於《白》排第2位就係美國性感女神瑪麗蓮夢露（Marilyn Monroe）50年代主演嘅《熱情如火》（Some Like It Hot），影片後來啟發咗「冷面笑匠」許冠文開拍《歡樂叮噹》。10大位置當然唔少得默片時代嘅喜劇巨星差利卓別靈（Charlie Chaplin），佢嘅名作之一1940年《大獨裁者》（The Great Dictator）「榜上有名」排第4位，佢藉影片盡情嘲諷納粹狂人希特拉（Aldolf Hitler），片中佢一人抱住個巨型地球氣球跳舞成為經典鏡頭。「搞笑能手」又且止「差利」一個，美國諧星標梅利（Bill Murray）有多部作品入圍今次呢個搞笑電影榜，分別就係排第10位嘅《偷天情緣》（Groundhog Day）同22位早年嘅《蠱惑仔出術》（Caddyshack）。 此外，一啲唔係咁好笑嘅電影包括2006年嘅《穿Prada的惡魔》（The Devil Wears Prada）以及1990年嘅《風月俏佳人》（Pretty Woman）都有打入「百大喜劇」。