何廣沛「夫妻檔」擺攤 親民吸客

藝人何廣沛計劃今年與拍拖3年的圈外女友Sarah拉埋天窗，日前兩人趁復活節假期「夫妻檔」上陣，於數碼港商場內的市集擺設檔位，推廣寵物用品生意，現場更頒發多個寵物界獎項。何廣沛帶同愛犬到場，他與戴上口罩的Sarah表現合拍，既招攬生意，又執拾貨品，十分落力。愛犬全程乖巧聽話，憑可愛模樣為主人吸引不少顧客，相當抵錫。期間有顧客上前集郵，何廣沛亦表現親民，任影唔嬲，更有小朋友上前與他合照。其後他發現有記者在場時一臉愕然，定神後才接受訪問，反觀Sarah相對怕醜，急急躲於檔位旁避免出鏡。何廣沛表示：「因為今日有個3周年慶典頒獎禮，我哋品牌好榮幸都攞咗個獎呀！」