大隻Rocky開新帳號借狗放閃 疑與崔碧珈「復合」

性感女星崔碧珈與年長21歲嘅「大隻Rocky」鄭健樂早前爆出譜父女戀，緋聞曝光後崔碧珈火速撇清關係，惟近日Rocky親證二人「有Kiss、有Hug、有拖手」，雖然見光兩個月即玩完，不過Rocky繼續表示日前崔碧珈就私訊問佢有冇新女友，疑似愛火現曙光。尋日（8日）Rocky於限時動態分享為狗狗開設嘅新Account，用戶簡介標註自己及崔碧珈個人帳戶。雖然帳戶未有帖文，但於動態精選中，就透露狗仔「波波」因主人生病而無法繼續被照顧，呼籲有心人能夠帶「波波」回家。Rocky用新帳號暗示自己同崔碧珈有聯絡，更志趣相投同樣愛心爆棚。 另外，Rocky昨晚又於動態分享「喜歡，只是開始。有心，才有未來。」的愛情語錄，似乎想借社交網向崔碧珈表露決心，以顯示自己有心經營呢段戀情嘅決心，更希望兩人能夠有屬於大家嘅未來，以實際行動積極追番崔碧珈。